Forsetinn virkjar lýðræðið. Fylkjum okkur á bak við hann.

Sundrungin í þjóðfélaginu hefur því miður orðið til þess að okkur Íslendingum hefur ekki tekist að sameinast um neina víglínu gagnvart kröfum Breta og Hollendinga. Þess vegna þurfum við nú að geta reitt okkur á forseta þjóðarinnar. Hann er sá eini sem getur hafið þetta mál upp úr skotgröfum pólitíkurinnar og þjappað þjóðinni saman til að verja hagsmuni sína. Þetta getur hann gert með því að bera Icesavemálið undir þjóðina. Flestir Íslendingar telja nú að draga eigi víglínuna um fyrirvara Alþingis sem settir voru á Icesave-ríkisábyrgðina í sumar.

Með Icesave lögunum í sumar sagði þjóðin við alþjóðasamfélagið að Íslenskur almenningur ætlar sér að ábyrgjast innistæðutryggingar vegna Icesave  þrátt fyrir að ekki hafi verið sýnt fram á að lagaleg skylda stæði til þess og að Bretar og Hollendingar meinuðu þjóðinni að fara með málið fyrir dómstóla. Þjóðin setti einungis þá sjálfsögðu fyrirvara á ábyrgðina að hún mætti ekki verða til þess að efnahagur landsins hryndi.
þessa fyrirvara gátu Bretar og Hollendingar ekki sætt sig við og það var látið eftir þeim vegna hótana að veikja þá svo að þeir urðu að engu.
Það er enginn reisn fyrir þjóðina að lyppast svona niður gagnrýnislaust gagnvart ofbeldinu sem þessar þjóðir sýndu þjóðinni. Íslendingar kæra sig ekki um slíkt og það skilur forsetinn okkar vel.

Ég ætla að leyfa mér að vera bjartsýnn og trúa því að forsetinn muni ná að þjappa þjóðinni saman í þessu máli með því að synja lögunum og láta þjóðina hafa síðasta orðið. Hann mun standa fastur í fæturnar og verja hagsmuni þjóðarinnar.

Blaðamannafundur í fyrramálið

Athugasemdir

[Hanna Friðriksdóttir (IP-tala skráð) 4.1.2010 kl. 17:47]

Halló Ólafur. Hvað á að kjósa um? Lestu eftirfarandi grein á Eyjunni: Um hvað verður kosið?
http://silfuregils.eyjan.is/

[Friðrik Hansen Guðmundsson, 4.1.2010 kl. 17:53]

Það birtist kl. 16.16 frétt á mbl.is þess efnis að forsetinn hafi hitt Jóhönnu og Steingrím í dag, sjá hér. Í framhaldi boðar forseti til blaðamannafundar á morgun kl. 11.00.

Í framhaldi af þessum tveim fréttum þá er mín tilgáta sú að forsetinn hafi tekið ákvörðun um helgina að synja lögunum um Icesave staðfestingar.

Mín tilgáta er sú að hann hafi hitt forystumenn ríkisstjórnarinnar í dag til að láta þau vita af þessari ákvörðun sinni, þannig að þau fái ráðrúm og tóm til að hugsa sitt ráð og undirbúa sig og ríkisstjórnina undir það sem forseti mun tilkynna á morgun. Forystumönnum ríkisstjórnarinnar gefist tími til að setja á blað yfirvegðu svör sem þau geta komið með fram á morgun og þau hafa tóm til að íhuga sinn næsta leik.

Mín tilgáta er sú að þessi dráttur á að forseti tilkynni niðurstöður sína það sé vinarbragð að hálfu forseta gagnvart forystumönnum ríkisstjórnarinnar. Dagurinn í dag, fyrsti virki dagurinn eftir áramótin, er tekinn í að láta ríkisstjórnina vita. Morgundagurinn er tekinn í að tilkynna þetta formlega.

En þetta eru jú bara mínar tilgátur nú þegar við öll, þjóðin og reyndar, eins yndislega og það hljómar nær allur heimurinn, bíðum spennt eftir blaðamannafundinum með forseta á morgun kl. 1.00.

[Hanna Friðriksdóttir (IP-tala skráð) 4.1.2010 kl. 19:02]

Ætlið þið félagar í Indefencehópnum að slá saman fyrir herkostnaðnum sem því mun óhjákvæmlega fylgja ef forsetinn skrifar ekki undir lögin og allt fer á annan endann?

[Sigurður Haraldsson, 4.1.2010 kl. 19:47]

Ég skal leggja mitt undir í herkostnaðinn gegn honum og embættinu ef forsetinn skrifar undir

[NN (IP-tala skráð) 4.1.2010 kl. 20:10]

Hanna, höfum ekki áhyggjur af greiðslu reikninga því Steingrímur og Jóhanna eru bestu handrukkarar á Íslandi og þau vita hvernig allir eiga að borg á réttlátann hátt. Ef maður bara kýs þau eða lætur þau hafa pening fyrir kosningar þá borgar maður minna eða allavega minna en hinir sem kjósa þau ekki.

Icesave reikningur S & J er reyndar óskiljanlegur því ég er látinn borga annarra manna skuldir. Sumir segja að það sé út af einhverju sem gerðist á síðustu öld en aðrir segja að ég eigi barasta auðvitað að borga fyrir syndir Íslendinga. Ef ég borga ekki þá verða vondu kallarnir voða reiðir og þau hætta barasta.

Stöndum saman með S & J því enginn á öllu Íslandi er betri en þau. Þetta er líka ekki þeim að kenna heldur öllum vondu köllunum. Þeir eru voða vondir og þess vegna verða þau að vera vond við mig, en auðvitað með réttlátum hætti.

Guð blessi Ísland og greiðslugetu þess.

[Jens Ólafsson, 4.1.2010 kl. 20:29]

Sæll Ólafur.

Ég verð að viðurkenna að ég er ekki jafn bjartsýnn og þú í þessu máli og er nokkuð sannfærður um að Ólafur Ragnar muni skrifa undir, sjá annars færslu mína http://kisilius.blog.is/blog/kisilius/entry/1000336/.Það kæmi mér skemmtilega á óvart ef Ólafur muni „standa fastur í fæturna og verja hagsmuni þjóðarinnar“, eins og þú orðar það, með því að synja lögunum. Einhvern veginn stórefa ég það, kannski er ég bara búinn að fylgjast svo lengi með hans pólitíska ferli.

Kveðja,
Jens.

[Hanna Friðriksdóttir (IP-tala skráð) 4.1.2010 kl. 21:09]

Þá stæði nú Ólafur Ragnar fyrst ekki í lappirnar ef hann skrifar ekki undir. Ef menn eru að kalla sig bjartsýna er þeir vona að forsetinn skrifi ekki undir icesavelögin, þá er fokið í flest skjól. Skynsömum mönnum er degi ljósara að herkostnaðurinn sem fylgir því að bíða og reyna enn og aftur að semja við Breta og Hollendinga er miklu meiri en svo að hann megi réttlæta með mögulegan en n.b. algerlega óljósum ávinningi. Tek ofan fyrir Bjarna Ben sem tjáði sig í fréttum um að honum fyndist að forsetinn ætti að staðfesta lögin. Ólafur Ragnar sýpur nú seyðið af að hafa tekið upp á því að beita neitunarákvæðinu er hann synjaði fjölmiðlalögunum. Með því kom hann forsetaembættinu í verulegan bobba. Það er í raun í hæsta máta ólýðræðislegt að forseti grípi fram fyrir hendur á lýðræðislega kjörinni ríkisstjórn í svo mikilvægu máli, enda trúi ég ekki að hann geri það, en hann er án efa í mikilli klemmu, klemmu sem hann sjálfur hefur komið sér í. Icesave hefur ekki verið kynnt nógu vel fyrir almenningi, allar hliðar þess og kostirnir í stöðunni og er þar bæði við ríkisstjórn og fjölmiðla að sakast og því hefur skapast umrædd "gjá" milli þings og þjóðar. Margir virðast halda að með því að segja nei við icesave gufi það hreinlega upp, en það er ekki svo. Gamla stjórnin og sú nýja með ríkisábyrgð í sumar (og Ólafur undirritaði það skjal) hafa þegar samþykkt að standa undir skuldbingum. Við erum nýstaðin upp frá samningaborðinu og það er ekkert sem bendir til þess að settumst við að því aftur nú næðum við betri samning.

[Friðrik Hansen Guðmundsson, 4.1.2010 kl. 21:49]

Sæl Hanna

Í sinni einföldustu mynd þá er þetta mál þannig vaxið fyrir mér að Íslenska ríkið á ekki að semja við hryðjuverkamenn.

Bretar settu fyrirvaralaust á okkur hryðjuverkalög sem hefur valdið okkur jafn miklu fjárhagstjóni og ef þeir hefðu sent hingað sprengjuflugvélar og lagt hálfa Reykjavík í rúst.

Íslenska ríkið átti aldrei að semja við bresku hryðjuverkamennina í þessum nótum og við áttum að vera búin að loka sendiráðinu í London fyrir löngu og kalla sendiherra okkar þar heim.

[Hanna Friðriksdóttir (IP-tala skráð) 5.1.2010 kl. 01:32]

Friðrik ég er innilega sammála að beiting hryðjuverkalaganna á okkur var algjör svívirða og ófyrirgefanlegt að í samningaferlinu um icesave hafi skaðinn sem þau hafa valdið Íslendingum ekki verið tekinn með í reikninginn og Bretar látnir koma til móts við okkur vegna þessa. Það er búið að klúðra mörgu í þessu ferli, en úr því sem komið er verðum við að bíta í það súra epli og byrja að vinna okkur út úr þessari erfiðu stöðu og það held ég verði ekki gert með því að koma hér á enn meiri óstöðugleika og óvissu bæði í stjórn- og efnhagsmálum sem neitun undirskriftar samningsins myndi hafa í för með sér. Annað: Mér finnst skrýtið þegar menn tala um að það sem lýðræðislegt að láta einn mann skera úr um hvort lög fara í gegn eða ekki. Það hefur hingað til verið kallað einræði og ég ætla rétt að vona að menn sjái eftir þessar hræðilegu reynslu undanfarinna daga og bið eftir að Herra Ólafur ákveði sig, að þetta er ekki mönnum né þingi bjóðandi. Verður að breyta stjórnarskránni hið snarasta og taka út málskotsréttinn eða færa yfir til þings og þjóðar. Vitandi af möguleikanum að forseti geti sett lagaundirskriftir í strand eftir hentugleika skapar óstöðugt og erfitt umhverfi fyrir stjórnvöld og veldur ringulreið meðal almennings, sem getur farið að "venja" sig við það að grenja utan í forsetann þyki þeim lýðræðislega kjörinn þingmeirihluti ekki hafa þjónað skoðunum þeirra og hagsmunum sem skyldi. Nei takk!

Líkja má icesavesamningaferli við grindahlaup:
Ef þú dettur um eina hindrunina og svo þá næstu, þá snýrðu ekki við til að reisa þær upp og heldur svo áfram og lendir í síðasta sæti, þú harkar af þér og heldur áfram og lendir kannski í því sjöunda fyrir vikið.